Red my, o my God, wil my bewaar!
Die vyande kom, 'n sterke skaar.
Neem my tog in u hoed' en wag
vir teëstanders en hul mag;
die manne wat enkel onreg werk,
is in hul dors vir bloed, my te sterk.
Want kyk, hul lê en loer op my.
Hoe sterk is nou my weerparty!
Hoe maak hul klaar en storm op my aan,
al het ek nooit ooit teen hul misdaan.
Ontwaak, my tegemoet, aanskou
hoe ek op U alleen vertrou!
O HERE, oneindig groot van mag,
o Israels God, gedug in krag,
ontwaak, en straf dié heidendom
dat daar geeneen u wraak ontkom!
Wees nie genadig nie, daal met straf
op elkeen dié troueloses af.
Oordag in skuilplek weggevlug,
kom hul by donker weer terug
en huil-dwaal soos honde deur die stad.
Kyk, hoe giftig is hul woorde wat
soos swaarde my die hart deurboor.
"En wie," sê hulle, "sal dit hoor?"
Maar U lag oor hul, o grote God!
U sal met al die heidene spot.
Op U, my Sterkte, wil ek wag,
U is my Rotsskans, hoog in mag;
U sal u wel guns aan my laat blyk,
my op my vyande neer laat kyk.
O HEER, moet hulle nie laat sterf,
maar laat hul soos 'n balling swerf;
sodat my volk dit sal sien en weet,
dat hul u gerig nooit mag vergeet.
Werp hul, o God, my Skild, terneer
as trotse skenders van u eer!
Wat is hulle ongesnoerde mond?
Hulle woord? 'n Dolksteek wat deurwond.
O, dat hul trots hul mag verstrik,
deur eie vloek en leu'ns verskrik.
Vernietig, HERE, in toorn en mag
die onregverdige se geslag,
dat elkeen helder kan bemerk
by so 'n straf en oordeelswerk
dat God 'n regverdig' vonnis vel
en die Koning is in Israel;
dat Jakobs God sy heerskappy
oor elke land en volk verbrei.
Oordag in hul skuilplek weggevlug,
kom hulle by donker weer terug
en huil soos honde deur die stad.
Dan swerf hul rond langs donker pad;
kom hul nie voor spyse op die spoor
dan bly hul loer, die hele nag oor.
Maar ék sal van u sterkte sing,
u goedheid vroeg my jubel bring:
U was my 'n toevlug in die nag,
'n rots toe ek in angs op U wag.
God van genaad en sterk daarby,
aan U sal ek my loflied wy!
.png){kind=icon}
iPsalm